Ինչպե՞ս պետք է սնվեն 50-ն անց կանայք

img

Դաշտանադադարի շրջանում կինն ավելի արագ է գիրանում, քանի որ մկանային զանգվածն սկսում է փոխարինվել ճարպային հյուսվածքով: Այդ պայմանավորված է նյութափոխանակության դանդաղմամբ, ինչի արդյունքում սննդի ածխաջրերի և ճարպերի մնացորդներն անխուսափելիորեն պահուստավորվում են որպես ճարպային հյուսվածք:

Հորմոնային փոփոխությունները կարող են հանգեցնել մի շարք նոր ախտանշանների և զգացողությունների (ջերմային առհոսք, գիշերային քրտնարտադրություն, գլխացավ և այլն), ինչպես նաև մեծացնել սրտի հիվանդությունների առաջացման վտանգը և նպաստել անոթային ճնշման բարձրացմանը:

Կլիմաքսի ժամանակ արյան մեջ էստրոգենների մակարդակի անկումը մեծացնում է օստեոպորոզի առաջացման վտանգը: Բացի այդ, ստամոքսահյութի ցածր թթվայնությունը նվազեցնում է օգտակար սննդանյութերի յուրացման արագությունը:

Հաշվի առնելով վերոնշյալը՝ ակնհայտ է դառնում, որ 50 տարեկանից հետո կինը պետք է հատուկ ուշադրություն դարձնի իր սննդակարգին: Այդպիսի «դիետայի» հիմնական նպատակը բնականոն քաշի և սրտի ու ոսկորների առողջության պահպանումն է:

Ավելի շատ վիտամին B12

Վիտամին B12-ը շատ կարևոր է նյարդային համակարգի համար: Առանց այդ վիտամինի անհնար է ԴՆԹ-ի բնականոն ձևավորումը, իսկ այդ պարագայում անհնար է նաև վնասված բջիջների վերականգնումը: Սովորաբար վիտամին В12-ը սննդից առանձնացվում է թթու ստամոքսահյութի ազդեցությամբ, սակայն տարիքին համընթաց ստամոքսահյութի թթվայնությունը պակասում է, ինչը դժվարացնում է վիտամին В12-ի ներծծումը: Փորձեք սննդում ավելի շատ օգտագործել ձկան և մսի անյուղ տեսակները:

Քիչ աղ, շատ բջջանյութ

Տարիքին համընթաց անոթային հիպերտենզիայի զարգացման վտանգը մեծանում է: Բարձր ճնշումը մեծացնում է սրտի կաթվածի, ինսուլտի, սրտի անբավարարության և անգամ հանկարծակի մահվան վտանգը: Անոթային հիպերտենզիայի և նրա հետևանքների վտանգը նվազեցնելու նպատակով հարկավոր է նվազեցնել աղի քանակը, ինչպես նաև ազատվել ավելորդ քաշից:

Բժիշկները խորհուրդ են տալիս օրվա ընթացքում օգտագործել առավելագույնը 1.5 գր աղ, ինչը հավասար է թեյի գդալի կեսին: Ուշադրություն դարձրեք այն հանգամանքին, որ աղն ամենամեծ քանակով պարունակվում է պատրաստի սննդամթերքներում՝ չիփսում, պահածոյացված, սառեցված ուտեստներում և այլն: Փորձեք ինքներդ ձեզ համար ուտելիքներ պատրաստել, որպեսզի վերահսկեք աղի քանակը:

Բջջանյութը սննդի կարևոր բաղադրիչներից է: Այն բարելավում է մարսողությունը, ինչպես նաև թույլ տալիս արագ հագենալ, իսկ դա նշանակում է ավելի քիչ ուտել: Մեծ քանակությամբ բջջանյութ են պարունակում նուշը, կանաչ ոլոռը, ամբողջական ցորենից պատրաստված հացը, շագանակագույն բրինձը, կաղամբը և այլն: Բջջանյութը հնարավոր է ընդունել նաև հաբերի տեսքով:

Ո՛չ երկաթի հավելումներին

Կանանց մեծամասնությունը 50 տարեկանում արդեն իսկ թևակոխել է դաշտանադադարի շրջան: Դա նշանակում է, որ ամիսը մի քանի օր այլևս արյուն չեն կորցնում: Այդ հանգամանքով պայմանավորված՝ օրգանիզմում երկաթի պահանջը նվազում է մինչև օրական 8մգ (նախքան դաշտանադադարը՝ 18մգ):

Եթե մուլտիվիտամինային հավելանյութեր եք օգտագործում, ապա ստուգեք բաղադրությունը. դրանք չպետք է երկաթ պարունակեն: Ձեզ անհրաժեշտ երկաթի քանակությունն այժմ ստանում եք սննդի միջոցով, իսկ այդ տարրի ավելցուկն օրգանիզմում կարող է կործանարար ազդեցություն ունենալ լյարդի, սրտի և այլ օրգանների վրա:

Վիտամինային հավելումներ կարելի է ընդունել միայն անհրաժեշտության դեպքում և միայն բժշկի նշանակմամբ:

Ավելի շատ կալցիում և վիտամին D

Ձեր ոսկորների առողջությունը չպետք է երկրորդական դառնա: Վերջիններիս կոտրման վտանգը մեծանում է հիսունն անց կանանց շրջանում: Եթե դաշտանադադարի փուլում եք և փոխարինիչ հորմոնային թերապիա եք անցնում, ապա պետք է օրական 1500մգ կալցիում ստանաք:

 

Սկզբնաղբյուրը՝ www.sotskiy.am

200
12/05/2019 09:34:50

Կարդացեք նաև

Հիշողության վատացումը և հեռուստացույցը

Երկարատև հեռուստացույց նայելը վատացնում է տարեցների հիշողությունը...

Սեռական կյանքը 50-ից հետո. տարիքը լուրջ գործոն չէ

Կա մի կարծրատիպ, որ 50 տարեկանից հետո սեռական կյանք գոյություն չունի, իսկ եթե լինում է, ուրեմն...

Բուժքրոջ դերը գերիատրիայում․ դասընթաց բուժքույրներ

Հիվանդանոցներում, տուն-ինտերնատներում, տանը բուժման և խնամքի կարիք ունեցող տարեցներին:

© 2019 gerontology.am | Բոլոր իրավունքները պաշտպանված են:

Կայքից ամբողջական կամ մասնակի մեջբերումներ կատարելիս ակտիվ հղումը gerontology.am-ին պարտադիր է:

Ստեղծել էHayrapetyanStyle և e_logo